客戶。服務

氣難平， 也唯有藉此抒發一下。

事緣小弟之3電話合約將於近日到期。身在台灣的我，只能以電話處理更改合約事宜；一世紀的電子聲音等待按1字2字3字已非新鮮事，豈料得到的答覆是：

「姚生你個合約想3g轉2g，電話改唔到，要落門市改喎。」

「你可以俾$12留住你個號碼，但係果邊部門線路繁忙喎。」

「不如你留個電話號碼我地再聯絡返你丫！…哦你係台灣呀……咁不如你留個電話號碼我地再聯絡返你丫！」

最離譜，是一位客服得知詳細情況後，將我轉駁至iPhone 4部門。你唔接我去消防局？？？

「唔好意思我地呢度唔負責呢樣野架…」

「哦咁你將我駁返去頭先果度丫唔該。」

「唔好意思我地無辦法將你條線駁返轉頭架，或者你再打一次我地既熱線xxxx-xxxx…」

「又打？我係台灣打黎，俾緊長途電話費架喎，又打一次咁邊個俾錢呀？」

「…哦咁或者你再打一次我地既熱線xxxx-xxxx…」

當然亦留下若干迷思，例如「…你意思係我係電話可以轉$138呢個貴plan，但無辦法轉$58呢個平plan？」等等…

客戶服務員，當然無錯，他們按本子辦事，紙上tree-diagram沒有列明，皆為世上空白之事，所以只得重覆一次那並非答案的答案。

那未，誰錯？

錯，當然在我。

第一，錯在相信3。早年一錯，曾經脫離，後來再錯，落得如此下場，怨誰？

第二，錯在我以為客戶服務，是真的「為客戶而服務」。

又或者他們真為客戶而服務，「客戶服務」四字本身亦無不妥，錯只在你真以為自己是「客戶」：期期準時乖乖繳款的羔羊，何德何能成為他們尊貴的客戶？

天真瀾漫至此，死不足惜。