最爆戲院

布冧除左Cable Beach之外，仲有一個地方非常值得介紹。

呢一間半露天戲院，已經為布冧放映電影有超過九十年，唔知係唔係澳洲最老既戲院，但必定比你細過仲係用緊手劃飛年代分上下兩層既戲院老唔知幾多倍。
整間戲院相當細，只有一個house，放映一套電影；放映螢幕係一個露天位置，觀眾可以分別選擇坐係露天或者有瓦遮頭既地方睇戲。櫈係類似係沙灘搵得到既尼龍櫈，初初坐會幾舒服，但係坐得耐左條腰會好攰，所以有鬼佬係拎住枕頭入黎睇戲既。

最鐘意既係男女廁依然係係螢幕左右下角！You ROCK!!!

一排沙灘櫈，一齊晒太陽

我梗係知道呢張好基啦。我梗係知道如果坐係度既係條鬼妹會幾咁好啦。我夠知你阿媽係女人啦。

鐵達尼號！我唔知點解好想睇鐵達尼號！

戲院入面既裝飾相當有味道。

仲有占士甸賣飛過你添噃！
無入戲院咁耐既我，見到呢一間咁爆既電影院，當然要睇返套戲。因為時間所限，我只能夠睇未世片2012，票價AUD16（呢間戲院都收我咁既價錢，香港睇戲又原來唔算貴喎），片長好似有兩個幾鐘，當我搵到一個全場最靚既位坐低，套戲開始播既時候，我發現幾貴都係值回票價：你攤係張沙灘櫈上面，望住前方係螢幕，螢幕上面就係月亮同埋星星，螢幕左右分別有幾棵大樹，個view係咪好正先？ 
未算。大樹忽然間會飛出幾隻蝙蝠由左邊經過螢幕飛去右邊，再由右邊經過螢幕飛返左邊（有隻仲掉野落黎添，唔知係咪痾屎呢，好彩唔中我），你真係會以為呢個係特技，你應該係買左套蝙蝠俠黎睇；睇睇下既時候你覺得熱，仲會有一陣風吹過，不過果陣風吹到樹葉係咁響，響到你係聽唔到對白乜滯；而當套戲講到主角要坐飛機去搭船果陣，竟然真係有架飛機係布冧機場起飛經過戲院，而機場基本上離戲院十分之近，所以架飛機好似係你頭頂飛過一樣，亦係震撼到你要um住對耳仔。
爆呢。睇未世片變左睇蝙蝠俠，仲要放真飛機黎配合劇情，百六蚊都做唔到啦，十六蚊直情係醒呀！
 
超可愛既一間戲院，我鐘意。